白癜风传染人吗 https://m.39.net/pf/a_4512728.html 原创沈嘉禄海上梦叠
作者：沈嘉禄
改编、朗读：牛美华
端午节，对中国人来讲也是一个重要个节日，除脱吃粽子、划龙舟、挂艾草、佩香囊，还要吃“五黄”。所谓“五黄”，就是黄鱼、黄鳝、黄瓜、咸蛋黄、雄黄酒，据讲，吃了五黄可以避五毒。还有一种说法更加讲究：“五月五，五黄三白过端午。”五黄之外还要吃三白：茭白、咸鸭蛋个蛋白、白切肉。
后来，有关部门认为雄黄就是四硫化四砷个俗称，伊是橘黄色粒状固体或橙黄色粉末，加热后勒空气当中容易氧化为三氧化二砷，也就是令人毛骨悚然个砒霜，所以雄黄是勿能吃了。我小辰光倒是吃过雄黄酒、雄黄豆，倒也一勿小心幸存下来了。
“五黄”当中个黄鱼，本来是寻常之物，现在倒是价值千金，一般人吃勿起了。所以也有人以黄豆芽代替，搿能一来，小日脚一记头就黯淡下去了，真叫人情以何堪啊！
我小辰光，菜场里个大黄鱼卖得邪气便宜，两三角一斤，我伲屋里也常庄吃个，姆妈清理大黄鱼，会得扯脱鱼头皮，让血水渗出来，烧熟以后就勿会得有腥味道。姆妈欢喜吃鱼头，还会得从嘴巴里向吐两块小石头出来，莹白如玉，蛮好白相个。姆妈讲：搿就是鱼脑石，所以大黄鱼也叫“石首鱼”，搿两块小石头也是一味中药唻。小黄鱼没石头，就比大黄鱼笨。
上海弄堂人家过去有句骂人闲话：“黄鱼脑子”，就是指伊些脑筋勿转弯个朋友。
大黄鱼个珍贵，还勒伊有绵软肥厚个鱼膘。烹饪辰光整条鱼一道加持，交关好吃，勒口感浪与紧实个鱼籽有同工异曲之妙。但是，饭店里个厨师也会得单独处理伊，有趟，我勒淮海东路鸿兴馆个厨房里看到，墙浪向白颜色个瓷砖浪贴了几十条黄鱼个膘，慢慢叫风干成为了半透明状。师傅告诉我，等到年底一道拿下来，摆到油锅里去炸到发泡，就可以做三鲜鱼肚羹了。
黄鱼属鱼纲、石首鱼科。勒中国个海错图版当中，黄鱼有大小之分，大黄鱼又叫大黄花、大金龙、大鲜、黄瓜，一般长度为40厘米到60厘米。小黄鱼又叫黄花鱼、小春鱼、小鲜，从长相浪看，小黄鱼是大黄鱼个迷你版，长度勿超过20厘米。捕捞大黄鱼是要讲究辰光个，夜里向捕捉，黄鱼出水以后金光闪闪，富贵而华丽，要是勒日里向捕捉，就呒没迭个颜色了。所以捉黄鱼是邪气辛苦个。
但是黄鱼蛮容易臭脱个，所以“绿眉毛”渔船出海前要备足冰块。黄鱼进舱，马上要撒一层冰块压牢，勒渔市浪，大黄鱼有个别名叫：“冰鲜”。一时头浪向来勿及冷处理，渔民就简单加工，从背脊处剖开以后加粗盐暴腌，挂勒桅杆浪经海风吹个两三日，就成了黄鱼鲞。勿剖而制成个白鲞更加高级，称为郎君鲞，是鱼鲞当中个白富美。
以前，勒上海个宁波馆子里，像西藏中路个甬江状元楼，咸菜大汤黄鱼是一款长销勿衰个经典名菜。一斤多个大黄鱼，弄清爽以后沥干，下油锅两面煎黄，加生姜片搭葱结，还有黄酒、盐适量，再加开水两大碗，大火烧开以后转中火，炖十几分钟后出锅，汤色奶白，黄鱼头尾勿散，味道邪气鲜个。上世纪八十年代末我还到甬江状元楼去吃过饭，后首来西藏中路拓宽，拆脱了。
甬江状元楼还有几道大黄鱼佳肴，譬如：苔条拖黄鱼，厨师用苔菜切成细末，搭面粉拌成稀糊状，将黄鱼切成直条，裹牢面糊摆到油锅里去煎到酥脆，鲜香酥腴，是一只老有风味个下酒小菜，小囡空口吃也老过念头个。现在有交关人欢喜吃英国个炸鱼薯条，但要是搭苔菜拖黄鱼一比么，就要差好几条横马路唻。
再讲回来，上海弄堂人家个家常风味，也是以咸菜大汤黄鱼个款式占据主导地位个。
上海人侪晓得，蹲守勒小菜场一角、姿态最最谦卑个咸菜，是最能提升大黄鱼个品质个。红烧大黄鱼、清蒸大黄鱼、糖醋大黄鱼、荠菜黄鱼羹，还有级别最高个松鼠大黄鱼，侪是经济实惠、风味卓绝、为上海人争得面子个待客佳肴，但搿些身段，勒咸菜大汤黄鱼面前头侪相形见绌。
咸菜大汤黄鱼个鲜，是热烈奔放、无拘无束、坦坦荡荡、载歌载舞个，就像一个阅人无数个美女，本身已然是玉树临风，又懂得哪能勒最有效个辰光里向用最简洁晓畅个语言、最生动活泼个表情来传递浓浓个感情。
勒老长个一段辰光里向，咸菜大汤黄鱼就成为了上海人家个一款基础味道，咸、香、鲜，鱼肉与浓汤，还有越嚼越鲜个咸菜梗子，侪是一竿子插到底个享受，沉淀勒碗底个细碎渣渣头也勿能浪费。每一汤匙送到嘴巴里去，侪搭牙齿、舌尖还有食道无比妥帖个抚慰，悠长个回味可以一直持续到初夏静夜、弥漫勒栀子花香个梦里向去。
若干年以后，思南路浪个阿娘咸菜黄鱼面一炮打响，成为了一款极具上海风味个国民小食，连得米其林也郑重其事个给予推荐评价。要是阿娘用红烧小黄鱼或者糖醋小黄鱼来配一碗阳春面个说话，火得起来伐？
上世纪七十年代以后，大黄鱼几乎是绝迹了。进入新生世纪以后又出现了，不过基本浪侪是养殖个。养殖个大黄鱼与记忆当中个味道相差忒远了，伊好像是另一个物种，或者讲是来自十分遥远个另一个星球浪个。现在，围网养殖技术有了明显提升，养殖大黄鱼当中也出现了高品质个货。所谓高品质么，就是最大限度个接近野生大黄鱼。搿里向涉及到交交关关专业问题，暂时按下勿表。
搿几年，我太太也经常买回来养殖大黄鱼，超市里有几十元一条个，也有一百多元一条个，伊一般选看上去顺眼个，价钿贵一眼也只好接受，以糖醋、红烧、清蒸、糟溜为主。只是勿敢搭咸菜一道烧一镬子浓汤，我晓得，养殖个货色还勿足以担当唤醒味觉记忆个重任，直到碰着了“闽东壹鱼”。
有趟，我勒北京东路一家饭店里吃到一道咸菜大汤黄鱼，一到嘴巴里向就像触电一样瞪圆了眼睛：迭个再是姆妈个味道呀！问过厨师，再晓得是用“闽东壹鱼”半野生大黄鱼做个。但“闽东壹鱼”大黄鱼专供饭店、酒家，勿设零售店，也呒没网购，要体验迭个味道啊，只好到进货饭店里去了……
作者：沈嘉禄
朗读者：牛美华
原标题：《初夏时节，应有咸菜大汤黄鱼》
